'Da Daya Namiji Tilo Ga Shugaba Kasa Muhammad Buhari Yana Kwance A Asibiti Rai A Hannun Allah

Yusuf Buhari, da namiji daya tilo ga Shugaba Muhammad Buhari ya samu mummanan rauni a kayinsa tare da samun karaye a bangarorin jikinsa daban-daban bayan da hadarin mashin ya rutsa da shi a daren jiya a Abuja

Majiya mai tushe ta tabbatarwa da jaridar DAILY NIGERIAN cewa, hadarin ya afku a daren jiya a lokacin da Yusuf ke tseren mashin din nan da ake kira da Power Bike shi da wani abokinsa.

Sitiyarin mashin ya kwace a lokacin da Yusuf ya yi yunkurin wuce abokin tseren nasa, inda daga nan ne ya bar kan titi ya yi cikin dajin da ke gefen titin ya kuma fadi ba cikin hayyacinsa ba

Wani makusancin gidan Shugaban Buhari wanda ya nemi da kar a ambaci sunansa ya shaidawa Daily Nigerian cewa, sai daga baya ne aka sanarwa da mai dakin shugaban kasa, Hajiya Aisha Buhari lamarin da ake ciki, inda nan take ta bayar da umarnin da a kai shi asibitin Cedarcrest inda a can ne yake karbar kulawa a halin yanzu

Wata majiya a asibitin da Yusif ke kwance ta ce “Mun fi damuwa da raunin da ke kansa sama da karaya da ya samu”

“Alamu na nuna cewa za a fitar da Yusuf wajen Nijeriya don samun kulawa daga kwararru”

Har zuwa lokacin da aka wallafa labarin nan, mun kasa samun mataimaki ga shugaban kasa kan harkokin yada labarai, Femi Adesina domin samun tabbacin halin da Yusuf ke ciki.